agbannawag

Agbannawag, panagbanatabat iti daya, panagtataraok dagiti manok.

Google

Wednesday, November 15, 2006

Agay-ayab ti langit…

Agay-ayab ti langit ditoy Keaka Drive, Imnas
Agay-ayab a kas iti sansilmo iti naggapasan, umayka, umayka
Nakitak ti rupana iti rabaw ti lamisaan
A nangipuni iti naklaat nga ayat.

Sinurotko, inanusak nga inugasan ti baggak
Kadagiti namnama a di makatalna, agkali, agmula, aggapas
Nagtugawak a nangisem kadagiti agpalaud a bannugis
Imbatik ti parmatak iti punget ti ilet dagiti matak
Maysa a nadagmel a panangilala iti lua
Eppes a dawa a bulibol dagiti sapatak.

Adda ngamin wagayway nga inyulesko iti pusok
Adda kanta nga inyugedko iti pinayatko a tapok.
Magnaak iti kadaratan a dapandapan
A mangimet iti ayat a saan a masupapakan
Ngem, agaw-awis, agaw-awis, ti bannugis
Kadagiti kallautang a saan a maigawgawid

Kunana: sika a pinapasan ti ilim,
Sika a pinapatay dagiti darepdepmo
Inarikap ti langit ti nakemko,
Makikakaasi ti ayat a binalon ti kadkaduak
A naikali iti sagumaymay.
Mariknak latta ti apges dagiti sugatko ken sugatkonto
Dagiti umbi ti ilik nga inted ti masanguanan.
Makusbo ti bigat kadagiti angin a nalidem, nalidlidem
Ngem awanan bannawag nga agpatnag.

Agay-ayab ti langit, agay-ayab, Imnas
Saanko nga ammo ti isungbatko kadagiti sansilmo iti sanguanak
Makatikaw ti buya iti tangatang ken ansad
Ditoy Keaka Drive,
Daytoy laeng ti nabatad:
Biniganbigat, adda reprep a pagaw nga agdisso a tumuktok
Kadagiti naiwarsi nga innapuy ken bagas.

8 Comments:

  • At 2:45 PM, Blogger rva said…

    siak man ket ti ayabam dita haway, gayyem jbm, ta umayak la nga umay, hehehe! naggasatkan, aya, ta nakapanka gayam dita pagnakeman. kinayatko met ti pimmanggep ngem diak sa maikari pay nga agnakem piman.

     
  • At 2:52 AM, Blogger joel said…

    gayyem roy, maysa a tagtagainep ti yuumay iti hawaii, ngem maysa a panagriing ti isasanglad ditoy. adu ti kinapudno a makita ditoy a nalabit mangkellaat iti maysa nga agdaldaliasat. isu a kunak a panagriing ti isasanglad.

    adu ti makan, naruar ti pirak ngem nasken nga ilumlomda ti bagida ditoy tapno agbiagda. nagasattayo gayam dita ta no malpasen ti raep, mabalintayon nga ipalpaldag dita sirsirok ti mangga, he he. awan kasta ditoy, gayyem. maut-utang a biag, kasta ti kinaagpaysona gayam gayyem, isuna laeng ta tay kunak, awan sa ti makuna a gawatda ditoy, awan panagbukona ta adda latta pirakda basta agtrabahoda. dayta ti pakaarusantayo.

    ken maysa pay, basbassit ti nagbabaetan dagiti tao ditoy. dagiti pagbiag a magatang ni milionario, mabalin a magatang met ni ordinario a mangmangged. kasta ti makitak.

     
  • At 8:03 AM, Blogger ariel said…

    ala, joel, kaaduem. tiliwem dagiti sirmata, adi.
    merry christmas!

     
  • At 8:37 AM, Blogger alatkenikan said…

    joel, ni raymond daytoy ipakammok laeng man met bareng mayyawawan ka diay laoag ket makainternet ka. ala addan to sagot ko'tay intelektualisasion ken apropiasion a makunkuna. urayem.

     
  • At 4:59 AM, Blogger ariel said…

    maturog manen ti blogmo, ading! anian a paidam dayta! ngem class-oriented ti teknolohia ken daytoy global a village ket maysa a putarputar dagiti kapitalista! i know you get the drift, ading.

     
  • At 3:36 AM, Blogger tommy said…

    Awan met ni mannaniwen? Saan ngata nga immakar ti disso? Ulit ulitek latta dagitoy daniw nan ah nu kasta!
    George ti Baggao

     
  • At 9:28 AM, Blogger windfield bacoy said…

    ala na talaga me maintindihan. a translation of the work is but fitting. i believe your work is worthy to be read by all.

     
  • At 11:25 AM, Blogger Sonata said…

    Hi manong Joel,makapailiw man dita Pilipinas dagitoy nga dandaniw mo...agsaraawak pay nga nakalagip iti pinakbet,dinardaraan,paksiw, kilawen,jumping salad.Congratulations for such a beautiful and meaningful poems!

     

Post a Comment

<< Home