Agay-ayab ti langit…

Agay-ayab ti langit ditoy Keaka Drive, Imnas
Agay-ayab a kas iti sansilmo iti naggapasan, umayka, umayka
Nakitak ti rupana iti rabaw ti lamisaan
A nangipuni iti naklaat nga ayat.

Sinurotko, inanusak nga inugasan ti baggak
Kadagiti namnama a di makatalna, agkali, agmula, aggapas
Nagtugawak a nangisem kadagiti agpalaud a bannugis
Imbatik ti parmatak iti punget ti ilet dagiti matak
Maysa a nadagmel a panangilala iti lua
Eppes a dawa a bulibol dagiti sapatak.

Adda ngamin wagayway nga inyulesko iti pusok
Adda kanta nga inyugedko iti pinayatko a tapok.
Magnaak iti kadaratan a dapandapan
A mangimet iti ayat a saan a masupapakan
Ngem, agaw-awis, agaw-awis, ti bannugis
Kadagiti kallautang a saan a maigawgawid

Kunana: sika a pinapasan ti ilim,
Sika a pinapatay dagiti darepdepmo
Inarikap ti langit ti nakemko,
Makikakaasi ti ayat a binalon ti kadkaduak
A naikali iti sagumaymay.
Mariknak latta ti apges dagiti sugatko ken sugatkonto
Dagiti umbi ti ilik nga inted ti masanguanan.
Makusbo ti bigat kadagiti angin a nalidem, nalidlidem
Ngem awanan bannawag nga agpatnag.

Agay-ayab ti langit, agay-ayab, Imnas
Saanko nga ammo ti isungbatko kadagiti sansilmo iti sanguanak
Makatikaw ti buya iti tangatang ken ansad
Ditoy Keaka Drive,
Daytoy laeng ti nabatad:
Biniganbigat, adda reprep a pagaw nga agdisso a tumuktok
Kadagiti naiwarsi nga innapuy ken bagas.