LAGIP

Idi inyukkor ti ili ti medalion kaniak
kas Outstanding Bannatiran In Literature,
Banna Town Fiesta, Abril 2, 2005)

Saannak a mailasin ti ilik iti daytoy a sardam-
Marmarna a balikas nga intinnag ti layap
Ngem agtakderak laeng a gudgudasen ti rag-o
A mangkunkunes kadagiti sao a diak pay napanday.
Agbibinegak nga agdaniw ita iti sennaay
Kadagiti panid ti panawen a diak pay naukagan
Kunaenda a siak ti bunannag dagiti naduog a parapo
Naglaga kadagiti pangngarig a di mabubuatan
Innalak ti rupa ti ili, wen, insursorko iti kainaran
Intayabko, inyam-ammok kadagiti kaulepan
Dagiti linablabidko a diak pay nataktakderan
Iti rupa ti init, sinaksiak dagiti maris ken lidemna-
Dagitoy kinunak dagiti sabeng ti gimongna
Lagaentayo a pagsasao kadagiti paginuduan
Dagitoy dagiti panatengna a di maagasan
Gatangentayo a pammigat kadagiti tientiendaan.

(Addanto laeng, wen, dagiti annak ti rabii
A mangsipsiput kadagiti agapon a balligi.)

Daytoy ngamin a nagan a tinawidtay iti bisin
Buniag daytoy ti siding iti dila a simmakrab iti tapok
Daytoy agkankanta a dakulap nga insuro ti lawag
Gayam makadayo daytoy a mangyurit iti bannawag
Kadagiti muging ti bigat: tagabo daytoy ti agpatnag
Mangpaltot kadagiti pangngarig ti daga ken tangatang
Makigubal iti tinta a mangigup iti kasipngetan.
Sadiay, mangasaak latta iti natadem a balikas,
Siak nga inammuyo dagiti timek ken kukua ni saem-
Agitunekak iti maiparit a pangngarig, bigat, aldaw
Aglugan iti barangay a puyoten ti bullalayaw!
Ania ngata ngamin ta mangidaton ti ili iti panaoenna
A pabpabasolen ti gimong kadagiti gurgurigorna?
Ala, sab-itak ti tudo iti sangasiglo a pampanunot
Ta inton taliawenda dagiti tugot iti kadandanuman
Makitadanton ti ili a burburtia a balinsuek.