No koma agkanta amin dagitoy…

1
Puypuyoten ti nginabras ti angin ti billiingna
Agtakder ti arapaap a mangkankanta kadagiti dawa
Nga agsagawisiw iti sab-ok ti kapanagan
A pappapatayenen ti kalgaw.

2
Daytoy nakigtot a taraok iti lam-ek
Ken nainayad nga ibabaddek ti linnaaw;
Agsasarita, agwingwingiwing dagiti dawis
Ti nadarupespes iti langit a ruot.

3
Adda met paggaak a bukbukodna ti dapogan
A manglalailo iti ruting, sakbay ti panangdadaelna;
Dagidiay piek a mangringgor iti kanen
Kas agsilamot nga ubbing iti lawlaw ti karaang.

4
Kailiw ti ulimek uray taraudi ti kurengreng
Ti agtugtuglep a gitara a nasipngetan
Agpaparaw nga ayat a naibatog iti gasera
A pagsalasalaan dagiti legleg.

5
Wenno ti ayab ti nawawan a pitupit
A mangsarsarak iti kaasi ti nakaturogen a waig;
Daytoy pay, di maitaguob ni Burbor nga iliw
Nga ikalawikiwna iti isasangpet.

6
Denggem ti uni ti panaltagan iti ikub
Ken daytay agpatayyek a panagtaep ni ikit
Ti babassit a talakitik dagiti madalupo nga irik
Iti sirok ti nakumbidar nga angin.

7
Daytay man agareng-eng a panagkunnot ni buridek
A lallalayan ti agpagunggan nga uriris ti sumipnget;
Agayab ti kabaian iti nagtawataw a kigawna
A sumangpet nga agmulmulmol dawa ti puriket.



8
Kalpasan man ti lailo dagiti apagassawa a ragsak
Tay in-inut nga aglibas a sennaay kalpasan ti saem
Agtanektek dagiti apagmaya pay laeng a saltek
Iti bubongan ti agsursuro a taeng.

9
No koma ta agkanta latta dagitoy iti koro ti ili
Adda koma latta aweng nga ig-igpilan ti Kailokuan;
Ngem iti luek ti samiweng ken pannakaikanta
Agtabon ken maitukit dagiti kansion.

10
Saanko nga ammo, siguro dagitoy dagiti daniw
Ken dung-aw a di pay naidiktar; ti ammok
Lagip ti maysa a barito a mangpuypuyot a sigagar
Iti maudi a billiing a pagay iti kagaramian.