Padasli

Kasano ngata ti agdaniwen? Kasla diak sa ammon. Padasek man a pagadalan dagitoy nagay-ayamak nga inkur-it idi Disiembre itay napan a tawen. Poetic studies laeng dagitoy.

Maymaysaakon…

Maymaysaakon kalpasan dagiti panagorasion

Kadinnakulapko ti mangin-inut a sipnget

A mangam-amloy kadagiti bulong

Santo umagep iti dapan

Ti ulimek.

Maymaysaakon a makidinnaniwan iti rabii

Bugbugtaken dagiti kariar ti panniki

Mangkarkarit iti umasul a solitariok

Sadanto met la agsubli iti abut

Ti panagtuglep

Damagek ti nagan dagiti baro a pannakaikawa

Amangan ta di laeng am-ammok dagitoy

Katugawko dagiti diak ammo a duadua

Iti kongkreto a pannakikappia

Iti musa a bukodko.

Maymaysaakon kalpasan ti maiserra a katawa

A maikupin libro ti baro ken duog

Damagek laengen dagiti diak maawatan

A maris iti angin ti karuotan

Kaduak a dipay nagkitem.

Maymaysaak latta a labsan ti agawid a lubong

A mangibati iti pukkaw ken daranudor

Agyamanak iti langit iti yiisemna

Umagek ti baguben iti pingpingna

Isaluketkon ti kandado ti kappia.

Agtakderak

Agtakderak: siuuyos a lasag

Iti bibig daytoy agwasangwasang a karayan

Umun-uneg latta ti di maisuro nga ayatna

Ti karina iti pinantarna a kadaratan

Adda amin a panangdungona kadagitoy bato

Bisil nga ay-ayamenna iti pus-ongna; aba’t-danum

A nakarukob a mangmatmatmat iti angga-angga

A lumned-tumpaw.

Daytoy ayus dungdunguenna amin a darat

Ti lap-ok ken ti taptapuyok, malukong a babassit

A di makaidna, ti danum yurayna

Maibiat a kasla panait a pana ti gilap

Manipud kadagiti ulep; kapardas ti mata a manglasat

Iti espasio ti panagayus ken pannakatnag.

Wen agsennaay ti ayus iti nakaro a waw

Iti agek ti nalamuyot a daton ti teppang.

Kastaak met kenka. Diak makakita iti isasangbay

Nga ilukatam ti naganko kadagiti pangngaduam.

Ay-ayatenka, kas iti panagayat ti karayan iti bisil

Kas ayus a di makapagpakada; ayatenka

A bisil iti pus-ong ti nalilibeg nga ayusan

A bisil nga aprosak iti naruot a riknak.

Taliawek dagiti silaw iti dumaya

Atapek nga imbitinmo dagita kas parolak

No sadino ita ti nangyakaram iti ridam ken orkidiam

Sibogak koma pay dagitoy iti ling-et ti dakulap

Uray pay dimo kiddawen ti dam-eg

Iti sirok ti sipnget ibitinko ti dungngok nga iket.

Nagsikigen ti gagan-ayan

Idiay adayo a langit insab-iten ti dugudog

Dagiti puraw a layagna

Natudio dagitoy a nangules iti daga

Kasta koma met ti aramidek kenka ayatko.

Iti daytoy teppang adda malmes a kalikagumko.

Iti daytoy a teppang agbennatak iti sennaay.

Unnaandakon a sumangpet dagiti linnaaw

Murmurayanda dagiti aggaatag a santol

Agawidak iti naladaw a sipnget a diak maurnos

Dagiti agkulkulaiseg a bara iti barukong

Panglinayko ngata daytoy; sika a pakauna a kimat

Sam-it ngata daytoy ti regget umuna a panangdilpat

Iti awan baorna a tinubong?

Ngem wen, saanko a kabaelan a sakaen ti karim

Ta insaluketmo daytan iti bangir a pisi ti kannag

Iti naparkagan ngem adayon a derraas.

Kaab-abayko ti lamiis…

Kaab-abayko ti lamiis ita

Damagek kenkuana dagiti dina am-ammo

A pagayam a mairupaak iti sango ti paginuduan.

Kitaem dagiti kataltalonan

Kayat a pagnaedan dagiti kigaw a perlas

Nagpaitulodda dita kadagiti payak ti sardam?

Arakupennak iti tumulang

A panangipatpateg; sika a kanayon

A sumangpet a silulugan kadagiti parbangon

Daytoy nabiit a patempateg

Urayek kadagiti naladaw a malem

Sagidennak, ulsannak kadagiti di maawis a ridep

Kaabayka ita iti rupanrupa

Iti bangkito iti kaasi ti parbangon

Mano pay a bigat a tagikukuaenta dagiti kinaridam?

Ah, maduduaak; sika ti musa

Dagiti daniw a naputar iti paginuduan?

Inton pumanawka, agkannak kadagiti linnaaw a luam!

Ania ti baro ditoy?

Mababain dagiti askawko itan

A bumaddek iti daytoy a dagam.

Sadiay, mabuteng nga aglayag dagiti mahogany

Iti panangawis ti anginna.

Ngem nalabbaga pay laeng dagiti ules ti patakder

A nabati iti baet dagiti aggagantil a muyong.

Ania ti baro ditoy? Baro kadi dagiti pagsasao

Kas iti daytoy nakiabig a pasdek

A minaruanyo iti nagan ken talek?

Adu dagiti naisibro a rupa

A diak ammo no maammuakto manen

Kablaawandak iti ganggannaet a sutil

Mariknak. Kukuak met dagitoy nga an-annong.

Ania ti baro ditoy? Nabursi kadi ti abel

Kadagiti sinanpuso nga agkikibin a bursina

Dagitoy ladawan ti agpipinnetpet a tedda met

Ti ilalasat dagiti sutil a dadael?

Ngem aglatlati ti binangonko nga arko ti sirib ditoy

Apay a di kadi itan aginaldaw a maluktan

Kas ruangan iti taeng dagiti agpadakkel iti nagan?

Adda kadi baro ditoy; addagita dagiti ruot

A mangtagtagikua kadagiti ping-ir ti kinadalimanek

Kukuayo pay laeng ken ilaloyo met dagiti kebbayo

Ti almusaryo iti sirib a nabaliktad a sao ti paayusna

Tay libbi ken paraipus dagiti gatgatangenyo a sarita

Sayonto manen ilako nga awan sabsaborna

Di ketdin ta por kilo amin dagiti addangyo

Ket di latta malpas dagiti linong iti kasipngetan.

Awan ti baro ditoy, umayen ti reggaay

Inton adda aldaw nga agipudno dagiti pakasaritaan

Nakamattider, agmulagatkayo a mataptapokan.

Wenno nagpalikud iti gimong iti naisugel a tugaw.