agbannawag

Agbannawag, panagbanatabat iti daya, panagtataraok dagiti manok.

Google

Sunday, August 14, 2005

Kastoy nga imbunubonko dagiti sarita iti danum, Imnas

Kastoy nga imbunubonko dagiti sarita iti danum, Imnas
Maysaak a pitakpitak, siit-siitan, immuging, sidudunor a lasag,
Maysa a taraytaray a dinilpatan ti lawag
Nalmes iti danum nga ininumna, agkaykayaw-at
A mangbugbuggo iti daga
Kadagiti balikas.

Sangapulo ket dua a tawen nga inipusko ti parbangon
Dinandanogko dagiti ulimekna, dagiti riknana- agtaraok iti sangit, garakgak
Rinabsutko kenkuana dagiti ladawan ti lidem ken lawag,
Mapa nga iggem dagiti dumadaniw, dumadaliasat iti kannag
Nagnaak iti kasiitan dagiti timek
Dagiti natayan iti timek
Dagiti nabagsol ti ayatna iti kainaran
Nakimaroak kadagiti kinapudno a lako dagiti karuotan
A nanglukais iti lumasat a gimong.
A nanglibas iti pagsasao iti paginuduan.
Nagimetak iti bibig ti apuy: daniw, balikas, bitla,
A nangpamaga kadagiti nangisit a danum
A nangsellep iti payak
Ti alimuken

Saritaek kenka:
Adda dan-aw dagiti baliang a nangperreng iti init
Kadagiti sabongda. Kinalay-atko ti sanga ti agwagwagwag a sirib
A nangagmuy iti aggilgilap a pingpingna
Nagtakderak iti kuko ti pannakawaw, ti bisin
Daytoy ti pupogan a nakatag-ay iti eppes nga angin
Imburaisko ti ariwanas iti dakulap ti danum, agkantaak, agbitlaak
Rutayrutay dagiti ayug a tinali ti kinakurapayko
Iti rabaw ti inut-utangko a tagainep, ngem nakitak!
Nakitak sadiay ti dila ti langit, ti tammudo ti kanito
Nakitak sadiay a nagikur-it ti tangatang
Kadagiti bannugis ti apuy a diak maawatan!
Nakilumba ti taraytaray iti muging dagiti anninaw a nakanganga
Tinuklaw ti buntiek ti angin, ti angin ti angesko
Naisugel dagiti ulep; simmalog dagiti gikgik
A nangkarkariar iti isem ti langit
Ngem immulog ti ulimek a nagdalungdong iti sabidong ti lubong
Dimmuros ti kasaor a nagriaw iti basol
Kinagubaldak iti kinakapsutko, kadagiti sugatko, iti danum
Ket ginepgeppasko ti karabukobda
Iti iking ti baliang.

Tapno maawatam itan no apay, Imnas
A sidadasayak, sisusugat iti igid a labaslabasan ti kannag,
Pagpaggaakan dagiti lawlawigan nga aglanglang-ay iti pannakatay,
Sipsiputak dagiti ima ti langit nga agikur-it iti pangngarig,
Dengdenggek ti daniw ti petalo ti init, ti gura
Dagiti darat nga agsungsung-ab.

4 Comments:

  • At 10:05 AM, Blogger jim agpalo, jr. said…

    wen, di mabannog ti ima ti langit nga agikur-it kadagiti pangngarig... isu dayta ti burasen dagiti mannurat a metapora

     
  • At 7:40 AM, Blogger ariel said…

    Hi Joel:
    Mabalin kadi nga ipablisko daytoy nga obra maestram iti
    The Weekly Inquirer Philippines?

    Sapay ta patgem ti kiddawko.
    I want both the English and the Ilokano for the Heritage Section of the paper.

    Maipurpuruak ti Inquirer iti mainland ken iti Hawaii.

    Manong A

     
  • At 12:20 PM, Blogger ariel said…

    Hi Joel,
    sugbatannakon, a, adi. wen, kunamon, ta mayatkan, ala.
    otherwise, i will be forced to publish it as such.
    Manong A

     
  • At 10:41 AM, Blogger ariel said…

    Joel,
    Impabliskon daytoy daniwmo iti Inquirer, kadakkelan ken kapintasan newspaper ditoy Amerika itatta, ahem-ahem!

    Daytoy tay pasimsim iti linuktak a heritage language and culture section.

    Sori ka, dikanto met ngamin sumungbat. Ngem patulodanka iti kopia.

    Manong A

     

Post a Comment

<< Home