Nalamiis dagiti dakulapmo, Tagainep…

Dinamagmo ti naganko, Tagainep

Kinunak met kenka a maysaak nga angin

Iti lubong, maysa a kararua, maysa a bannatiran

A mangun-unor iti pingping, rupa, muging

Ken lua ti agtedted a panunot.

Maysa a dagaang, maysa nga apuy iti lam-ek

Iti lam-ekmo.

Bumabanniit dagiti matam

A nakakitaak iti agsapa dagiti sabong

Ti tanap a di nakita dagiti kulibangbang.

Umisemka a kinargam ti gagan-ayan nga agliklikig

Iti oras a pinarbona. Agtaltalimpungawak-

Itaak kadi laeng a maipasngay iti lawag?

Ammok ngatan ti kaipapanan

Ti wingiwing a maibiat iti law-ang?

Wenno maysa a maregreg a balikas

Iti karuotan?

Apay a nalamiis ti dakulapmo iti apuy ti langit

A mangtiltiliw iti kararua ti timek

A dina kayat ti lumugan iti angin?

Agtakderka nga agukas kadagiti burburtia ti ili?

Kadagiti allawig a kukua ti kainaran, soneto, sasao, pampanunot?

Kitaem dagitoy: ti langit a nangakup iti kannag

Dagiti sallapingaw a nangduros iti tangatang,

Ti sawi a mangsipsippayot iti agmatuon

Ken daytoy karuotan a paggilgilapan dagiti siddaaw

A sidudunggo nga impaidda ti bannawag!

Saanmo nga ikkaten ti karbenganda a maipasngay,

Dagitoy nga anninaw iti puso ti kalgaw-

Agkiddaw ti tudo iti pingping ti daga a dagusanna,

Ti apuy ti ragsak, ti uram iti barukong, iti sumpokanda nga ulep:

Iti pannakainaw dagiti dumsaag a bituen iti tanap.

Nalamiis ti dakulapmo, Tagainep,

Maysa a lam-ek ti agsapa a kabsat ti rabii,

Agwaneswes ti tay-ak a manglabas kadagiti dapanta

Iti karuotan a pakaipasngayan dagiti umatiddog nga anniniwan:

Nakitam kadi ti ipapatay ti gilap ti linnaaw?